Act 28 | WNU | STEP | In gugum end isune ne munon ginam eng der wurinou ai qaur eng unum Malta ende ininob qamb wogub sig mom inbanamsi ne qen end ya derer end winingune gab mut gumotar ende at diamirei.

Acts 28

28:1-10 Pol ai qaur Malta end isub igoai

1 In gugum end isune ne munon ginam eng der wurinou ai qaur eng unum Malta ende ininob qamb wogub sig mom inbanamsi ne qen end ya derer end winingune gab mut gumotar ende at diamirei. 3 Ende abari Pol mur qungau ger bemeni mut erer qumo bigor ego mur qungau erobon end mani guterag ger igama ten ba biga mut oa bo paranub diab Pol wonou ubent goterei. 4 Got uri igama munon ginam qenen ende gab wurinou qob-qob qamamir: “Wa, munon eng mai igeig tari end qiyo ya nub me uminer qamb mani goar eng. Moui qomon boru eng taui goa umibar eng.” 5 Ende qamb igamari Pol mani ubent uri igoar eng ombopur mutet ariramorei. 6 Ende ebet mag uburab qiyo uminer qamb qoat igamari qen dirigor isa gab qamamir: “Wa, e munon apand ue, ai bigau ne,” ende qamamirei.

7 Ne ginam eng qani end munon baraitari aib ger igoai. Wo munon yurau eng gugum oroar igoai. Unum eng Publius. Wo inamar wonou munai mor end isa is qen ombur gari end igunei. 8 Qen end Publius wonou ur eng toar wara inab igoai. Ende igama Pol munai tumbigi end isub Qenut qamb git goan baab aba toar eng wagerei. 9 Ende aba qob toau isa igub munon ai qaurt eng toar igab igoar eng gugum yarari Pol wurimusub igoai. 10 In ginam end igumune mi irou ar indab igurei. Ende at igamari inaun ombur gari uma wogub bo qoaub pisiune tabint isub minomun qamb mani irou ba di tabint ariramirei.

28:11-16 Pol Rom weib isorei

11 In ginam end igumune munon ginam Aleksandria wurinou tabin ger isib ater eng moon aib ende aba wogub igoai. Tabin eng ‘Aibigau ombur eng wurinou’ qamb igurei. Moon diarau qen mom waga in ai qaur eng wogub tabin eng ba isi ginam aib Sirakyus qamb igour end is qen ombur gari bo end igunei. 13 Ne bo end tabin ba tumbigi isi ginam aib Regium end isumirei. Urigerma der tumbigi isubune moon yaremint wes end yar tabin bea ten isub igumune qen ombur ubura ginam aib ger Puteoli end isuminei. 14 Ginam end isub ibagamin eng munon yurau qei Yisast oabig igour eng end igo inororari inorou gari end wurinob igoi wogub bo tumbigi isi maket ginam ger ‘Apius wonou maket’ qamb igour end weib isune Rom munon qei Yisast oabig igour eng inombogoub qamb diamirei. Derari bo erogori tumbigi isi yarab mon ar ombur gari mindatemir end igumune bo Yisas yurau qei Rom wogub qataben inombogoub qamb diamirei. Diab igamari ibag Pol Qenut borusi mismisir wo end nonoguretarei.

16 Ende at wogub Rom ginamt umo isub Pol wonou munai wes utari igama burtuum ger qenen qoat igoai.

28:17-31 Pol qob uber Rom end dibes qamarei

17 Ende igamari qen ombur gari uma ne Pol Yuda munon barai-barai Rom igour eng wurit qamara yaremirei. Yar qiumunimari wurinob qamar: “Ye qomon boru ger ininou yurau end ger ebet qiyo ininou tonoan qomon eng ger me nugutumugau. Ar ye baab Yerusalem qite uyort yebigumirei igo ye mot Rom gabmant isumirei. 18 Isub Rom gabman munon eng ye qebi qamarari ye meimi qomon boru ebetemei igama yanamb at igour qi eng qemerine igub me yanamau. 19 Ende yewagari Yuda wuri der yanamar qamb Rom gabman qenen sesimot igurei. Ende abari ye qob ger qamarau ue eng gab yiimurimari gabman gigit Sisar wot isub qob qemerine iginer ende qemerine ye mot dururei. Ye yonou munon tau eng bo uyort wuribigib qamb me darau. 20 Ye qob eng aninob qemerib qamb anit qurumei. An eng imbigar: ye uben tourimour ten igoum eng qanam eng. In Isrel boru igumune Qenu Munon Aib init imuriamor eng wot oabig wo qob ne wo sarau ebeter eng ye toat at qirine qomon boru qamb yetouriamirei.”

21 Ende qamara wuri der qamamir: “In Yudia end nenet namanimun ger gumari me geau. Ne munon banam ger yar nonou qomon eng gagar gor ininob qamara me ne iotarau. 22 Ego munon gugum der munon Yisast oabig igour eng wurit mindigarub igour eng in qoyam. End ne mai ne gor wuri yurau eng wurinob soriamonei qiyo. Eng sir qamara igun.”

23 Ende qamb wogub qen ger maribig wugumirei igo munon yurau irou yarari Pol qob wurinob qamb igoai. Qamb qamar: “Qenu mi gugum qanam. Wo in munangit inoar igo Munon Aib init imurima derer end inubersia qenen bebereg igoruboun. Qob eng Moses qomon gumater eng ne munon Qenu qob gigit gumatemir eng Yisas inubersierib qamb dara wuri qob eng irimaniamorei,” Pol itumut ende wurinob qamb igama igoi isi itum wobon isorei. 24 Ende qamara qei io qamamir, qei wo qob me igetau. 25 Misir qebebi igub at igamari Pol qob ger ete wurinob qamar:

“Qenu Igomurur qau wonou qob gigit qamarau munon Aisaia nob qamara aninou tonoan eng wurit ete gumaterei: Ne is munon eng qob wurinob qamara git igunor ego qob sir me imbigunorei. Ne git gunor ego musub me gunorei.
27 Munon yurau eng wuri qomon wes-wes qo wuritramor end qob igun qamb iruges bataisiorubour. Ne mi gun qamb mag maurimbour. Wuri mi git gab a iruges big igub yet oabig igo qi eng qomon boru mogirt wab wogub yet yarari ye wurimusiaum qi,
Qenu ende qamarei.

28 Pol ende qamb wogub qamar: “An igar, an Yuda Qenu qob uber siningot oboumon eng aninou tonoan qomon eng mom toat igoumon. End ne see munon yurau asin eng irou Qenu qob igub wot oabigari wuriubersieriba.” 29 Pol ende wuri nob qamb waga wuri iua wurinou agu qupurutari igurei.

30 Ne Pol togun ombur Rom end igo wonou munai igoar eng taui mi wurisab ne munon irou qunan yar wo banamsiari mismisir igoai. 31 Igo qen end bo Qenu mi gugum qanam ne Yisas ininou munon baraitari aib eng gugum dibes wurinob qamb igoai. Munon ger qen end me taisiau. Ye qob ende gari.